البارح و آنا مروحة من الخدمة، عرضني سرسوط كراهب طويل عريض، من الشمال إلى الجنوب و من الشرق إلى الغرب في ثنيّة الX20. شنوّة! آش ثمّة! أشغال شاقة زعمة!؟
زدت قدّمت بالخطيوة بالخطيوة، لاح لي في الأفق البعيد سيارة إسعاف معطلة كيفنا في الكيّاس!! هي سيّارة إسعاف مخدمة الضو و ساعة على ساعة تخدّم عرائس البحر بالكشي إلّي مازال ما فهمش روحو يفيق من الغيبوبة المزمنة و يتذكّر شنوّ قرا في قانون السياقة بش يفسح المجال لسيارة الإسعاف و يتّكى على جنب!
فريق الإسعاف ما قعدش مكتوف الأيدي الحقيقة و يعطيهم ألف صحّة، على خاطر نضموا رواحهم: شي هبط ينضّم في حركة المرور خاطر وحدنا ما نجموش نتنضّموا بعدلّي كل واحد فينا يخمّم في روحو و في كيفاش بش يقلّع البلاصة لصاحبو. و شي مشى يجري لمكان وقوع الحادث ثمّاش ما ينجموا يعطيوا الإسعافات الأوليّة في إنتظار وصول سيّارة الإسعاف. ماهو الحادث طلع في الكيّاس إلّي عل اليسار و سيّارة الإسعاف في الكيّاس اليمين (يعني إلّي آنا واحلة فيه)!!
و لوكان جات الدنيا دنيا، فاش قام تتعطّل صفة اليمين!!! قال شنوّة التونسي وقتها تتحيّرعليه مشاعر الأخويّة و الإستلطاف (قول "اللّطف يا ربّي") و إتخاذ كذا حادث موعضة لمن يتعض ( قول "أستغفر الله ولا حول و لا قوّة إلا بالله").
باللّه كان تحبّوا تنفعوا ضحايا الحوادث حطوا الجملة هذه حَلأة في وُدَنْكُمْ
"! Circulez, y a rien à voir "
هناك تعليقان (2):
il y a une expression de sa'd zaghloul que j'aime beaucoup dit :'Ce n'est pas de beaucoup de savoir que nous avons le plus besoin mais de beaucoup de moralité." quand je marche dans les rues de Paris je ne peux pas m'empecher a penser pourquoi ils sont si propres meme tard dans le soir, je pense que les tunisiens manquent cruellement de sens citoyen
C'est du pur Tunisien, j'aime beaucoup
إرسال تعليق