الإسلام دين تسامح بالسَّيْف عليك ! (2)

كنت عملت مقدّمة هنا على محور هذه السلسلة متع المدونات و فسّرت أسبابها.
و توّة بش نحكي على آية السيف و شنوما الآيات و القيم إلّي يقال أنّها نسختهم و كيفاش المنطق السليم مع شويّة آيات بينات من القرآن يقللنا إلّي الآية هذه (آية السيف) ما تنجمش تنسخ حتى آية.

شنيّة آية السيف؟ هو في الحقيقة "العلماء الأفاضل" إلّي أشرتلهم في المدونة السابقة هوما بيدهم ما همش متفاهمين عليها! زعمة هي "وقاتلوا المشركين كافة كما يقاتلونكم كافة" (التوبة: 36) و إلّا هي "انفروا خفافا وثقالا وجاهدوا بأموالكم وأنفسكم في سبيل الله" (التوبة: 41) و إلّا بالكشي "قاتلوا الذين لا يؤمنون بالله ولا باليوم الآخر ولا يحرمون ما حرم الله ورسوله ولا يدينون دين الحق من الذين أوتوا الكتاب حتى يعطوا الجزية عن يد وهم صاغرون" (التوبة: 29)؟؟

بداية باهية ياسر و تبشّر ياسر! هوما متفاهمين إلّي آية السيف هاذي متواجدة في سورة التوبة و اللي هي لازم بش تكون ناسخة آية و إلّا 100، أما موش متفاهمين شنيّة هي. خطاب غريب و منطق أغرب!!

هي أكثر آية شاع فيها إلّي هي آية السيف هي هذه :
"فَإِذَا انسَلَخَ الأَشْهُرُ الْحُرُمُ فَاقْتُلُواْ الْمُشْرِكِينَ حَيْثُ وَجَدتُّمُوهُمْ وَخُذُوهُمْ وَاحْصُرُوهُمْ وَاقْعُدُواْ لَهُمْ كُلَّ مَرْصَدٍ فَإِن تَابُواْ وَأَقَامُواْ الصَّلاَةَ وَآتَوُاْ الزَّكَاةَ فَخَلُّواْ سَبِيلَهُمْ إِنَّ اللّهَ غَفُورٌ رَّحِيمٌ" (التوبة: 5)

حاسيلو الحكاية و ما فيها إلي قالك ملّي هبطت الآية هاذي، ربّي سبحانو و معظم شانو ملّي كان يؤمر في المسلمين بالصبر و العفو والبر والقسط والتسامح وعدم الإعتداء كمبادء في التعامل مع غير المسلمين بدّل رأيو و قاللهم من هنا فصاعدا سفّح سفّح وراء بعضو.

قالك الآية هاذي نسخت، شد عندك:

- "لا إكراه في الدين قد تبين الرشد من الغي" (البقرة: 256)

- "ادع إلى سبيل ربك بالحكمة والموعظة الحسنة" (النحل: 125)

- "وإن جنحوا للسلم فاجنح لها وتوكل على الله"(الأنفال: 61)

- "وقاتلوا في سبيل الله الذين يقاتلونكم ولا تعتدوا" (البقرة: 190)

- "فإن اعتزلوكم فلم يقاتلوكم وألقوا إليكم السلم فما جعل الله لكم عليهم سبيلا" (النساء: 90)

- "لا ينهاكم الله عن الذين لم يقاتلوكم في الدين ولم يخرجوكم من دياركم أن تبروهم وتقسطوا إليهم" (الممتحنة: 8)

- و إلّا هاذي "أَلَيْسَ اللَّهُ بِأَحْكَمِ الْحَاكِمِين" (التين:8)!!

ومازال الشيّ.!! الله غالب منجمش نكتبهم الكل من كثرتهم! حاسيلو ما خلاو ما فسخوا!

هي بش تكون الآية هذه ناسخة لآية أخرى لازم الزوز يكونو متناقضين و الأحكام متاعهم ما ينجموش يتواجدو فرد وقت.

الآية هذه هبطت في وقت إلّي غير المسلمين متآمرين على المسلمين لقتلهم أو لأسرهم أو لإخراجهم من ديارهم : فتنة يعني.و المسلمين وقتها تعرضوا للإعتداء من طرف هؤلاء. ياخي ربي أمر المسلمين بش يقاتلوهم في سورة التوبة، و بالتحديد في الآيات إلّي ذكرتها في الأوّل. يعني أمر المقاتلة جاء في ضرف معين و لفئة معينة من الناس. الناس إلّي قاعدين يعتديو عل المسلمين.

و بش نوضحلكم كلامي هذا، هذه الآية إلّي جات قبل آية السيف:
"إِلاَّ الَّذِينَ عَاهَدتُّم مِّنَ الْمُشْرِكِينَ ثُمَّ لَمْ يَنقُصُوكُمْ شَيْئًا وَلَمْ يُظَاهِرُواْ عَلَيْكُمْ أَحَدًا فَأَتِمُّواْ إِلَيْهِمْ عَهْدَهُمْ إِلَى مُدَّتِهِمْ إِنَّ اللَّهَ يُحِبُّ الْمُتَّقِينَ" (التوبة: 4)
يعني المقاتلة ما تصحش مع الْمُشْرِكِينَ إلّي المسلمين معاهدينهم و إذى بالطبيعة الْمُشْرِكِينَ هذم ما أخلفوش بوعدهم.

باهي بش تقولولي و المشركين إلّي ما تعاهدوش مع المسلمين و ما أذاوش المسلمين كيفاش يتعاملوا معاهم المسلمين في حالة الحرب المعلنة؟ الإجابة نلقاوها في الآية إلّي جات بعد آية السيف:

"وَإِنْ أَحَدٌ مِنْ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلامَ اللَّهِ ثُمَّ أَبْلِغْهُ مَأْمَنَهُ ذَلِكَ بِأَنَّهُمْ قَوْمٌ لا يَعْلَمُونَ" (التوبة 6).

شمعنتها الكلام هذا؟ معنتها في هل الحرب المعلنة، إذا جاك واحد مشرك و قالك أنا خاطيني من أعدائك و راني مسالم، مش تمشي تقتلو! لا! و زادة مش تجبروا بش يولّي مسلم زادة! لا!
"إمالا شنعماّو هذا ؟ نتسامح معاه؟ كيفاش نتسامح معاه و آنا مسلم لازم بش نكون متجبر و كشاكشي خارجة و عاقد حواجبي و نكره الناس الكل؟!"

بالسيف عليك لازم تتسامح معاه، و كان ما عجبكش بدّل دينك! ربي قالك لازم ما تؤذيهش و ما فيها باس توصلو الرسالة المحمدية، كان حب ياخذ بكلامك حاجة باهية، كان ما حبّش موش لازم، و فوق من هذاك الكل توصلو حتى لدويرتو و لعايلتو آمن.

توّة هذا ما يتناقضش مع الإكراه في الدين؟ هذا ما يتناقضش مع وجوب الحرب حتى لوكان غير المسلمين ما همش معتدين على المسلمين؟

و بِلاّهي إلّي مصدق حكاية الإكراه في الدين هاذي، تنجموشي تفهموني كيفاش واحد دخل في دين الإسلام بالسيف ينجم يكون مسلم صادق و ما يكونش أكبر منافق؟! وقت إلّي ربي يوعد في المنافقين بالعذاب في جهنم، كيفاش ينجم يشجع على الإسلام بالسيف؟

وجوب النسخ ما يكون إذا الأحكام يتناقضو و لا يمكن الجمع بيناتهم. و آنا بينتلكم إلّي يمكن الجمع بين المقاتلة و الصلح و عدم الإكراه في الدين.

آخر حاجة بش نفسرها في السلسلة هذه هي الآية هاذي : "وَقَاتِلُوهُمْ حَتَّى لاَ تَكُونَ فِتْنَةٌ وَيَكُونَ الدِّينُ كُلُّهُ لِلَّهِ " ردّا على إقتراح من المدون عاشور الناجي.