العزوزة هاززها الواد و تقول عام صابة

السنا برشا ناس ما هيش بش تمشي للحج عملا بالتوصيات متع الدولة إلي خايفة علينا من المرض متع الحلالف - أما الحلالف لخرين ماهيش خايفة علينا منهم-

و لذلك و بفضل السياسة المجيدة لعم الحاج، قرروا السنا بش يجيبولنا الحج حتى لهوني لتونس و الفعاليات متاعو بش تدور في قصرالرياضة بالمنزه و سيتم الطواف حول أهم حاجة تمثل مشاغل التونسي و تقوم حولها النقاشات و حتى النقد يا بو ڨلب : النقد البناء و المدمر زادة و تتلم العايلة حول حصة بالمكشوف بش تشارك في النقاش: موش نقاش مشاكل المجتمع، لا كيفاش، عندنا مشاكل أحنا، موش حلو الكلام هذا! آه إما لا شنوة؟ الكرة يا ولدي الكرة!!!

قالك السنا بش يجوبلنا كأس العالم إلي الفحولة متاعنا ما نجموش يجيبوها. بش يحطوها في وسط العباد، و يبداو يطوفو بيها و يمسحوا عليها و يبوسوا فيها و يبكيو عليها و يقراو شوية فاتحة و يدعيو شوية دعاء ثماش ما ربي يجيب عبادو الكوارجية في الصواب!!!

ربي يخللينا عم الحاج إلي خمم في التوانسة و جابلهم الحج الكروي حتى لتونس، خلي نلقاو آش ننقدوا عل القليلة

شكرا

شكرا يا سيادة الحاج

يشعلوا في النار و يقولوا الدخان منين، ... و كليمة لحسين

الأيامات ثم أصوات في البلوڨسفير قاعدة تقلك الأمبيونس ولات خايبة في البلوڨسفير، ثمة برشة سبان و تخربيش كرامة و تحريض عل الفساد!!

سبحان مغير الأحوال، البارح الناس هذم بيدهم إلي كان هم تدوينهم الوحيد في الصباح، في الليل في رمضان و في أي وقت تسنحلهم الفرصة، همهم الوحيد كان تخربيش كرامة المسلمين، الصايمين، المصلين، إلخ. قال شنوة يحبوا يصلحوا المجتمع و هوما متع الفن و الأحاسيس الفياضة و متع السيكس (من المستحسن خارج منضومة الزواج) و العرى و السكرة يتجرحوا كيف يراو الناس بحذاهم مسلمين.

أي يتجرحوا، و لذا هوما يشوفوا أنهم عندهم كامل الحق في سب المسلمين ونعتهم بالغباء و بالحيوانية و السخرية من معتقداتهم. وتكثر أعمالهم هذه في رمضان، عادي جدا. و حتى حد ما كلم حسين بش يشطبلهم مدوناتهم من البلوڨسفير.

باهي... هوما توة كي فاقو إلي الأمبيونس ولات خايبة؟! آنا نقللهم إلي بقية المدونين حسو بالأمبيونس فسدت عندها مديدة الحكاية، فسدت خاطر ثم مدونين سيبو مشاغل المجتمع التونسي و العربي و شدو في التمنييك عالدين كيف بصة الحجام. و شدو في كالحكاية كعرر و عاود كعرر و عاود لين مصاتت.

و الناس إلي ما عطاوش أهمية في الأول لهل الجميعة، حسوا برواحهم لازمهم ياخذوا منهم موقف. كيفاش؟ كلموا زعمة حسين بش يطردهم، عملوا إشهار لموقع بلوڨسفير آخر بش يعملوا زعمة زعمة ضغط على حسين؟لا! لكن دونوا على رواحهم، عبروا على أراؤهم.

و آنا نشوف إلي التدوينة لخرة إلي مهتمة بالجميعة هذم ، و مانيش ندافع عليها بش ما تفهمونيش بالغالط، التدوينة هذه ماهي إلا نتيجة الأمبيونس الخايبة و التوتر إلي زرعوه في البلوڨسفير. و إلي يشعل النار ما يلزموش يتسائل الدخان منين، وماعليهم كان يتحملوا عواقب الثنية إلي متبعينها

و إلي مخوفني أكثر، أنو الجميعة هذم إلي يحكيو بحرية التعبير، ماهم مستعدين بش يطبقوها كان على رواحهم ( كيف الصهاينة بالضبط). يعني هوما ميسالش يفسدوا الجو، أما المدونين لخرين ما عندهمش الحق بش يعترضوا، و كان يعترضوا يوليو هوما إلي يفسدوا في الجو.

و توة يا حسين يبداولك بمدونة ريسوريكسيون، و يتعداو من بعد لتيموريات وفي الأخر بش تلقى روحك تفسخ في مدونات المعارضين لهل الناس، خاطر هوما فنانين، حساسين، يلزمهم يدونو و يعبروا على مشاعرهم الجياشة، والناس لخرين ما عندهمش الحق في التدوين على خاطر يفسدوا في الجو متاعهم!!

و لذلك يا تتحملوا مسؤولية المنهج إلي تنتهجوا فيه، يا نعملوا الكل مع بعضنآآآآآا من أجل تدوين ينفع المجتمع التونسي.

الراجل راجل و الكلب يقعد كلب

منتظر الزيدي دخل التاريخ من باب الرجولية كي طيش صباتو على أحقر بشر (هوكا ما قلتش إنسان) في العالم. و الله تطييش صباط على جلغتو أضعف الإيمان كيف واحد يغير عل الوطن متاعو!

أما شوف حكمة ربنا يا واد، شوف حكمة ربنا!! اللحاسة إلي حاطينهم يحكمو في العراق و يخدموا في الحكومة الأمريكية موش العراقيين (حوس إفهم)، الأوباش هاذم شدو مزبلو بحالو و زيد حكمو عليه ب3 سنين و زيد عذبوه في الحبس و يحرز إلي الكلب بوش ( و ياسر فيه كلمة كلب، خاطر الكلب هايشة بكمة ما تتشرفش بش تكون كيفو) خرج من الحكم بش نقصولو الحكم للعام.

و بالله شكون حطوا هل القانون متع 3 سنين حبس نحب نعرف، حطتوا حكومة العراق المستقلة زعمة؟

واحد يشوف الضلم بعينه و أقل حاجة ينجم يعملها أنو يتكلم، يدون، يساند المضلومين.

وقتلي الجزائريين حاربوا المستعمر اتهموهم بالشغب و الإرهاب، تقول بلاد بوهم. وقتلي عمر المختار حارب الطليان اتهموه بإثارة العصيان كاينهم الطليان كيف جاو لليبيا شاوروا مواطنينها قبل و وضعوا قوانين متفاهمين عليها في التعامل ما بيناتهم.

صورة لعمر المختار الراجل مربوط،... و الكلاب مسيبة

و توة في عام 2009 حتى شيء ما تبدل، ضربة صباط مع سابق الإصرار و الترصد تساوي عديتك أعوام حبس مع التعذيب. هاذي هي الديمقراطية الغربية، الإنسانية الغربية. صحيح البيوعين عندهم دخل في الحكاية لكن شكون يمول فيهم، ماهم إلا عبد المأمور.

إنت بطل يا منتظر، ما همتكش نفسك، حزت في نفسك كان التشتت إلي عاشو الشعب العراقي في جرت وعود الأمريكان الكاذبة بالديمقراطية و السلام، حزت في نفسك الأرامل و اليتامى، حزت في نفسك ضحايا البطش الأمريكي (قالك شعب صديق و مسالم).

و هذه آخر أخبارو

عاشور و حكاياتو

عاشور يعيش وليدي، آنا اليوم ما قريتش تدوينتك الكل ما عنديش برشة وقت و أتوة نحاول نكمل نقراها من بعد، أما راك كيف البارح كلك تناقض.

إنت تقول "لا يوجد شيئ اسمه الله فهو مجرد وثن اصطفاه محمد من بين بقية آلهة مكة، " آنا نقلك إلي العرب يؤمنو بالله من قبل لا يجيهم محمد، و لاهم مسيحيين و لاهم يهود.و الله عندهم هو خالقهم ما هوش وثن. طلعوا هبطوا قالك ربنا هذا ما يستجاب لدعانا كان على طريق أولادو و بناتو. قاموا عملوا أصنام تمثل "ذرية" ربي بش يتقربولوا و ما هيش حكاية فن و تسامح لكن تعبد، و ما همش متسامحين مع إلي ما يؤمنش بربي على طريقتهم هوما.

و الدليل على ذلك ملاحقتهم و تعذيبهم للمسلمين. و الإسلام جاء بش يصلح الشرك بربي و يقوللهم عندكم مولى واحد لا عندو ذرية لا شيء، تحبوا تتقربولو، تقربولوا مباشرة من غير أكسسوارات. و كيف محمد قاللهم هكا ما عجبتهمش الحكاية و هو من الأول كلم جماعتو قريش من غير طغيان و إلا تجبر هو كان "منذر"، "رسول"، الهداية موش في يدو لاكن في يد خالقو.

و المسلمين في قريش قداش تعرضو للتسامح و الفن و إعمال العقل هكا و إلا لا يا عاشور! ما و هذا آش تحب تقول! غير المسلم هو المتسامح، أما الله غالب المسلمين متجبرين و طغات أسروهم! هكا شماتة! يعيش وليدي برا أحكي الحكاية هذه لواحد بلاش عقل و إلا نقلك "غني ... و جناحك أكيد بش يرد عليك"

هاذي من ناحية، من ناحية أخرى خرافة أمي سيسي إلي جابدها من موقع تبشيري ( وهذا يأكد الكلام إلي كنت نقول فيه عند تيمور، و هاك تزلعت وحدك وحدك). الخرافة هذه فيها الواقدي و ابن إسحاق إلي مشكوك في صدقهم ( أما هذه حاجة ما تهمش بالنسبة ليك و قرائك)، و تخرج من الحكاية و ما زلت ما عرفتش شكون القاتل و شكون المقتول ؟!! خاطر كل واحد يحكي في الحادثة كيف ما عاشها و كيف ما استنبطها و كيف ما وصلتو!

و كلام الجماعة إلي تتعلل بيه ،أو بالأحرى يتعللوا بيه المبشرين بش يأثروا في المسلمين إلي ما يعرفوا شيء عل الإسلام، الكلام هذا ما عندو حتى صحة من الناحية التاريخية، و لذلك ما عندوا حتى قيمة في تأييد كلامك. و هنا بش نوصل لتناقض آخر في تدوينك، نذكرك شقلت هوني "و أساطير الأولين لازالت تلّقن جيلا بعد جيل شفاهيا ، فلا عجب أن تكون مهنة الفداوي/الحكواتي/المدعوذ الأكثر انتشارا و مكسبا". و هاك إنت طلعت أكثر مدون ياخو بكلام ناس مشكوك في صدقهم و كلام منقول شفاهيا! كاينو عندك الفرقان، يعني تؤمن بيه و بصحتو!! يا عاشور ياخي شنوة دينك؟ يمكن إنت بيدك ما تملكش الجواب! و هذه حاجة ملموسة من تدوينك، نحسك كاينك تلوج على حاجة و ماكش عارف شنية

"مكتوب" علينا الإنحراف و "ضلفة هندي" للي ما يحبش يجي للثنية

عندي مدة نحب نحكي على مسلل مكتوب، أما ما عرفتش على شنوة بش نبدى نحكي، خاصة إلي آنا عمناول بطلت الفرجة فيه يضهرلي من نهارة إلي قالو ثمة جزء ثاني لهل المسلسل العضيم.

ياخي اليوم في الصباح، نقرا في البلوڨسفير في المدونة آرابـيــــكـــا، تدوينة في نفس الموضوع. الموضوع هذا حيرلي مواجعي و قلت خلي حتى آنا نزيد نقول حويجة في المسلسل هذا. خاصة إلي الإستبلاه و التبهنيس أكثر حاجة تكسرلي كرايمي بعد النفاق.

أولا المسلسل هذا كان بش يتعمل لرمضان عمناول فقط، أما كيف Cactus (ربي يدوم نعمتها) هي الرأس المدبر قرروا بش يشرمطوه للسنا زادة!

و هذا الإختيار تبرره الصفقات ما بينات Cactus و الإذاعة والتلفزة التونسية. و الصفقات هذه الإذاعة والتلفزة التونسية داخلة فيها في الخسارة و خارجة من الربح (المادي بالطبيعة).


ثانيا "الأبطال" متع المسلسل شخصيتهم و تصرفهم مجعولة بطريقة تعطي شرعية للجانب المريض في أخلاقيات المواطن التونسي، موش بش يعالجهم. يعني كاينو المسلل thérapie de groupe مسلطة علينا بش المجتمع التونسي يزيد يفسد موش يتحسن و ياخذو شوكو و دالي و لاخر لزعر (نسيت إسمو) كمثل أعلى لازم نتبعوهم بش نبداو In.

و نتصور الشباب التونسي إلي ديجا محضر نفسيا لاستيعاب مثل هذه التصرفات المنحرفة- و الفضل يرجع للحصص مثل الصنادق و غياب النقد ( ما ريتو حاضر كان في الكرة) و الحصص الفارغة إلي معبية بيهم الإذاعة والتلفزة و ركنsoirée VIP في موزاييك، و و و (الله غالب ما نجمش نذكر كل شيء و نشاء الله إلي ما ذكرتوش ما يتغشش عاد )- قلنا عاد الشباب التونسي إلي شادد في كحة ما هوش بش يتردد لحظة بش يلبي نداء الجماعة إلي متخبية وراء إسم Cactus و يولي الإنحراف عندو هدف حياتو. و اللي بش يتردد و يناقش و يقول كيفاش ما يجيش منو؟ مزمرة عليه و ضلفة هندي تجيه!

و الشىء من مأتاه لا يستغرب! كيفاش تحب واحد منحرف يحسن وضعية بلادو؟ كيفاش تحبو يدور دولابو بالطريقة إلي نعرفوها في مجتمع يطالب بحقوقو و إذا بحقوق غيرو، في مجتمع متضامن موش أناني، في مجتمع متثقف موش شاددلي في الشوالق، في مجتمع متحضر في مجتمع يخمم في مستقبل زغارو موش كيفاس بش يعدي الوقت الحاضر؟

رد متواضع لسي طارق

أستاذ طارق،
حبيت نرد عليك في المدونة متاعي، لأسباب تقنية بحتة.

الرد بش يكون على تدوينتك هاذي: فتوى.

تحكي على فتوى أصدرها الشيخ القرضاوي، و كانت ناتجة على حادثة وقعت في الطيارة و هي أنو "قائد الطائرة الأجنبي غير المسلم يعلن أنه حان وقت الإفطار "مع أن الشمس ساطعة والنهار بين"، مشيرا إلى أن حجة قائد الطائرة كانت "أن المغرب تحتنا قد حل"".

نذكر إلي الشيخ كان مسافر وقتها من مصر إلى الدوحة ، يعني مسافة صغيرة و إذا واحد ينجم يصوم، يصوم ما فيها باس و ما يقعدش يرجع في الدين متاعو. و أنا شخصيا جربت الصيام في الطيارة لمسافات قصيرة و النهار يتعدى لاباس، الحاجة الوحيدة إلي تكسرلي كرايمي هي الديوانة التونسية!

و لذلك "الفتوى" تخص الناس إلي تحب تصوم في الطيارة، و اللي ما يحبش يصوم ما يصوموش و ينجم يرجع الدين متاعو بعد رمضان.

هاذي من ناحية.

و في ما يخص الجملة هاذي " ما يهمّش الأرض مدوّرة واتدور موش الشمس طالعة هابطة عليها هههه" هههههه الله غالب ما نجمتش نشد روحي من الضحك، خاطر:
- أولا تحب تتهكم على فكرة أنو الغروب متع الشمس اللي يشوفو البشر ما عندو حتى صلة بالألتيتيد إلو هو فيها: يعني الإنسان عندك إنت في نفس النقطة في الأرض ينجم يشوف غروب الشمس فرد وقت كيف يبدى على سطح الأرض و إلا يبدى في الطيارة على خاطر الأرض مدورة و على خاطر إلي قال عكس هذا هو واحد جاهل على خاطر عالم في الدين ( Donc ما ينجم يكون كان جاهل بالعلوم الأخرى)
- ثانيا خاطر إلي يقرا السيرة الذاتية متاعك، يلقى إلي إنت:DPhil candidate in Science and Technology Studies at" Keble College, University of Oxford"

باهي شوف الصورة البريئة متع الأطفال هذه بشنوة توحيلك و افهم وحدك وحدك عاد إنت متاع العلوم ؛) و شوف كيفاش على خاطر الأرض مدورة، على هذاكة الإنسان إلي في الطيارة يشوف المغرب بعد إلي يبدى في دويرتو في نفس النقطة في الأرض



هاك تعلمت حويجة لخرة من هل الفتوى الضلامية هههههههههه

و أخيرا القرضاوي ماهوش راهب من الرهبان بش يقمع روحو في الدنيا، هو حر يعمل حتى طائرة خاصة بيه، أمورو!

هذا الكل بش نقول، تحبو تنقدو، أنقدو حتى حد ما شدكم أما بربي قولو حويجة صحيحة لخرة و ماتبتاوش تمخورو راهو الناس ما همش أغبياء كيما ماشي في بالكم، يعني ما تستبهلوناش ياسر ؛)

رمضان مبروك للي يعتبرو مبروك

رمضان جاء شاء من شاء وأبى من أبى!

و التعلات المجبودة مل الحيط بش يفسرولنا بيهم :
- إلي رمضان حاجة خطيرة فوق تصور البشر، قالك البشر يبدى عاقل كالحمل الوديع، فجأة يصوم، يولي قتال رواح و سارق و غشاش.
-واللي مشكلة الدزان عل الخبز من رمضان بيدو (كاينو عبد هذا رمضان) موش من سلوكيات العباد! لا بلكل! تي قالك التونسي يكون في قمة التحضر، يجيه رمضان، يولي وحش مسيب!
- إلي العباد كيف يجي رمضان، تسيب الدنيا الكل و مشاكلها (فقر، استغلال)، تبعد عل العلم و تتلهى في سيدك رمضان. يعني كاينو العبد ما ينجمش يصوم و يصلي و فرد وقت يخدم، يتعلم يعلم، يفيد المجتمع. حسب التعلات هذم الإنسان في رمضان يولي متجبر متخلف! خاطر يا يصوم يا يتطور!!! واحد منهم ما ينجمش الزوز فرد وقت، عندنا مخ واحد و يلزمنا نسايسو عليه

التعلات هذم، كيفاش ينجم واحد ينعتهم؟إممممممم... مقنعين ياسر! أما الله غالب أحنا المسلمين أغبياء، و نقعدوا طول عمرنا أغبياء على خاطر مسلمين. لذلك أحنا السنا زادة بش نصومو رغم إلي جاي في الصيف و الإنتاجية بش تطيح و بش نتحولو لمجرمين.

و لأننا أحنا أغبياء و متخلفين قرر بعض المدونين المتثقفين و الأذكياء، مشكورين فعلا على المجهود الجبار إلي يبذلو فيه الأيامات، بالقيام بحملة توعية في الوقاية موش من السلوكيات المنحرفة، لاكن من الصوم بيدو بعدلي أثبتوا علميا أنو الصوم يتسبب في التخلف إلي نعيشوه في الشهر هذا.

بالطبيعة المدونين هذم، ذوي العزيمة الجبارة -إلي تهد الحيوط- في عدم الصيام و في ترشف القهوة في شارع الحبيب بورقيبة في وضح النهار في شهر رمضان، الناس هذم ماهمش مستحقين بش يفسروا علاش هوما ما يصوموش، خاطر هوم مقتنعين في وجوب عدم الصيام إقتناع ما يزعزو حتى غزرة قاسية من مار في شارع الحبيب بورقيبة، و يقعد متمسمر غادي في كرسيه ما يحركو شيء.

و لذلك ما تفهموش تدويناتهم على أنها تفسير لإختيارهم يفضح ضعف شخصيتهم، لا، تمشيوش تفهمو هكا!

دايور، عمركمشي ريتو مسلم يفسر علاش هو يصوم. هو مقتنع باختيارو، ما ثماش علاش بش يعطي أدلة! كان إنت سئلتو أهو ك يفسرلك، كان ما سئلتوش ما يحسش بروحو ملزوز بش يحكي في الموضوع. هذه حكاية بيناتو هو و خالقو.

و بالمناسبة هاذي، نتوجه بالشكر (حلوة الجملة هذه) لصاحبة مدونة بنت عايلة، إلي برشة عباد ما فهموش مدوناتها هذه و هذه، و إلي قايمة بالواجب على طريقتها في الإنذار من عواقب هذا الشهر الفضيل.

أيا رمضانكم مبروك