23‏/09‏/2009

العزوزة هاززها الواد و تقول عام صابة

السنا برشا ناس ما هيش بش تمشي للحج عملا بالتوصيات متع الدولة إلي خايفة علينا من المرض متع الحلالف - أما الحلالف لخرين ماهيش خايفة علينا منهم-

و لذلك و بفضل السياسة المجيدة لعم الحاج، قرروا السنا بش يجيبولنا الحج حتى لهوني لتونس و الفعاليات متاعو بش تدور في قصرالرياضة بالمنزه و سيتم الطواف حول أهم حاجة تمثل مشاغل التونسي و تقوم حولها النقاشات و حتى النقد يا بو ڨلب : النقد البناء و المدمر زادة و تتلم العايلة حول حصة بالمكشوف بش تشارك في النقاش: موش نقاش مشاكل المجتمع، لا كيفاش، عندنا مشاكل أحنا، موش حلو الكلام هذا! آه إما لا شنوة؟ الكرة يا ولدي الكرة!!!

قالك السنا بش يجوبلنا كأس العالم إلي الفحولة متاعنا ما نجموش يجيبوها. بش يحطوها في وسط العباد، و يبداو يطوفو بيها و يمسحوا عليها و يبوسوا فيها و يبكيو عليها و يقراو شوية فاتحة و يدعيو شوية دعاء ثماش ما ربي يجيب عبادو الكوارجية في الصواب!!!

ربي يخللينا عم الحاج إلي خمم في التوانسة و جابلهم الحج الكروي حتى لتونس، خلي نلقاو آش ننقدوا عل القليلة

شكرا

شكرا يا سيادة الحاج

هناك 3 تعليقات:

هشوش يقول...

ههههههههههههههها
امال كي العاده عندي برشا ما قريتلكش (لا محاله توحشت كتاباتك) حلوه النقشه ولو اني ما نوافقكش إلى حد ما ...
ملاحظه صغيره مش الحاج إلي جاب الكاس جابها حاج اخر .... حاج البيره إلي يعيطولو بوصبيع هاويني حجه على قاعده !!!
بالنسبه للكاس هي بالطبيعه موش باش نضخموها لدرجة انو نردوها في قيمة حجه لا بالطبيعه اما تقعد رمز م الرموز للمغرومين بالجلد المكعبر (ههههه) 13 كيلو ذهب
معنتها نحب نقول و انو الكاس جات لتونس عام 2006 زاده و جابها نفس السيد لشارع الحبيب بورڨيبه و نتفكر وقتها اعضاء مجلس النواب (خاصة إلي ما عندهم حتى علاقه بالكوره و لا بالرياضه) يتجاراو باش يتصورو مع معشوقة المليارات
اما عجبتني الغمزه إلي عملتها هاو جابوهالهم كي ما نجموش يجيبوها وحدهم ...
لا محاله مازال في الشك كان هوما باش يمشيولها من اصلو مش باش يوصلو يجيبوها !!!
تحياتي امال و ان شاء الله عيدك مبروك و كل عام و انتي بخير

هشوش يقول...
أزال المؤلف هذا التعليق.
Amel يقول...

نشاء الله كل عام حيين بخير و مرحبا بيك،

آنا في الحقيقة ما نحبش الكرة يمكن على هذاك ماناش بش نتفاهموا ؛)

"ملاحظه صغيره مش الحاج إلي جاب الكاس جابها حاج اخر .... حاج البيره إلي يعيطولو بوصبيع هاويني حجه على قاعده !!!"

ماو كيما تعرف الحاج لاخر جابها بإذن مل المعلم الكبير، و في تونس إلي يعمل الخير يشاور قبل؛)